الله الله ياباشا على المرور والتاكسى والامخاخ الى فيها هشاشه

اليكم احد المسلسلات الماساوية التى تعرض فى رمضان على شاشات الطرق السريعة فى مصرنا الحبيبة :
الحلقة الاولى : نهار خاجى قبل الفطار
المنظر:
سيارة تاكسى رقم 844225 اجرة جيزة وسيارة صغيرة خاصة بأحد المواطنين بها اثنين موظفين راجعين من عملهم بالقاهرة كل الى مسكنه فى مدينة السادس من اكتوبر وعلى طريق المحور
الحركة :
يقوم سائق السيارة التاكسى رقم (844225 اجرة جيزة) بحركة بهلوانية شديدة الخطورة بالإنتقال من اقصى اليمين الى اقصى الشمال دون ان ينظر فى المرآة ودون اى مراعاة لمن ياتى من خلفه مما يكاد يؤدى لانقلاب السيارة التى يستقلها الشابان ولولا فضل الله وستره ولولا قدرة قائد السيارة الخاصة فى السيطرة عليها لكانا الان فى عداد الاموات.

الحلقة الثانية :
المنظر :
بعد فترة من السير فى الطريق يتصادف وجود التاكسى بجوار السيارة الخاصة فيحاول الشابان افهام السائق انه يجب ان ينظر اولا فى المرآة وان يعطى لمن خلفه اشارة تدل على نيته فى الإنحراف يسارا وان يقوم بتقدير سرعة القادم من خلفه لكنه ينهرهما ويسبهما وينطلق بسيارته بسرعة جنونية .

الحلقة الثالثة والاخيرة :
المنظر : موتوسيكل النجدة فوق طريق مصر اسكندرية الصحراوى ( سائق الموتوسيكل يجلس فوقه ويمسك مصحف ويخشع فى القراءة ولا يلتفت للطريق نهائيا )
يتوقف الشابان بجواره ويرويان له ما جرى فيعتزر مستأسفا انا ماقدرش اسيب هنا
ويتعاون ويقوم بالاتصال بكمين اكتوبر ( الو الو كمين اكتوبر الو الو كمين اكتوبر ماحدش بيرد ياباشا)
طيب ولو حد محتاج مساعدة ولا حادثة ولا حاجة ؟ يسأل الشابان
لو حادثة يطلب النجدة !!! ولو حد خبطك ابقى خد نمرته واعمل محضر فى القسم
الشابان فى صوت واحد حسبى الله ونعم الوكيل

اخرتها اهى

مات الملك .... عاش الملك
نفس الملك ؟؟ .... نفس الملك !!

يموت أموت
يعيش أعيش
مايهمنيش غير انى بس ماجيش في يوم في أيد شاويش
أهبل غشيم غبي ولئيم عامل ملاك وهو أصله شيطان رجيم

يضرب قفا
ويـختفا
وجزمه (شوز) من ام بوز تنزل تطرقع عالنافوخ
أكيد هاقع
أكيد هادوخ
أكيد هاموت
لكن الأكيد وأنا الشهيد
هاهتف بصوت عالي قوى : "مات الملك .. مات الملك.."
ويرد كل الكون على :"ياعبيط عاش الملك .. نفس الملك"
____________________________

اخرتها ايه

اخرتها ايه ؟؟؟ ده السؤال الى ماحدش عارفله اجابة لحد دلوقتى فى بر مصر المحروسة ...

الكل مشغول بتفاصيل الى بيحصل فى البلد شوية حاسسين انهم هما الشعب وشوية حاسسين ان فيه مؤامرة علشان يفضل النظام زى ماهوه وشوية بيدوروا على اى حاجة يعملوها وشوية يبدوروا على الشوية الى فاتوا علشان يمشوهم زى ماهم عاوزين ... المشكلة ان كل ده كويس وصحى للبلد بس كمان ممكن يتقلب لفوضى وتخريب خلو بالكو خافوا على البلد خافوا على البلد خافوا عالبلد ....

الواحد مابقاش عارف يعمل ايه ولا يبقى مع مين وضد مين ( بس بطبيعة المصريين اى حاجة فيها لبش وممكن تجيب مشاكل الواحد يتجنبها احسن - زمان قالوا الباب الى يجيلك منه الريح سده واستريح- بس النعامة الى بتحط راسها فى الرمل مش بتشوف الاسد بس هوه شايفها اذن محاولة التظاهر بان المشاكل مش موجودة مش هايحلها حاجة تحير فعلا)

- يعنى مثلا اكيد البلد فيها حاجات كتير غلط

-- طب وايه يعنى ماكل البلاد فيها حاجات غلط

- ياعم والناس الى مش لاقية تاكل

-- طب مافيه دول كتير افقر مننا وبيموتوا من الجوع

- طيب والناس البلد برة

-- بتحصل

- بس لازم فيه حد سهل لهم الموضوع وهربهم برة البلد وكدة لان البنك مش هايديك 500 جنيه من غير ضمانات ويمضيك على شيكات وبلاوى لغاية مايطلع روحك يبقى دول اكيد مش لوحدهم.

-- الفساد فى كل حتة فى الدنيا والى مش عاجبه يحصل مدحت صالح على اى كوكب تانى وخصوصا ان زحل طالب ناس يشتغلوا فى التنقيب عن النيتروجين

- بس برضه ده مش حل واقعى انت عارف التذكرة لزحل بكام دلوقتى ؟؟ والاقامة والكفيل هاياخد نص الى بتكسبه ياعم دى شغلانة .

-- طيب ايه المطلوب ؟؟

- مانصلح البلد !!

-- صلح هوه حد حايشك ؟؟؟

- مانا خايف اقول حاجة الاقى نفسى ورا الشمس

-- خلاص ماتقولش ..!

- مانا لو ماقلتش ابقى سلبى واستاهل الى يجرالى ....

-- حيرتنى طب عاوز ايه ؟

-مش عارف انا كل الى انا عاوزه

• انى اشتغل فى حاجة بافهم فيها
• واكسب رزق يكفينى لانا عاوز عربية مش عارف ايه ولا فيلا
• انا عاوز اكل كويس
• والبس كويس
• واعرف اعلم عيالى
• واجوزهم
• واستر على بناتى
• وابقى محترم كدة فى الشارع
• وفى المواصلات
• وفى الشغل
• حتى فى قسم البوليس لما ادخله اخد حقى بمنتهى الادب
• عاوز اشتغل وادفع ضرايب زى اى حد فى اى بلد فى الدنيا
• واحس ان الى بدفعه بيرجع ليا ولولادى فى شكل خدمات
• عاوز اى موظف يحس انه بياخد مرتبه من ضرايبى فيعاملنى كويس ومايفتحليش الدرج علشان اخد حقى
• عاوز لما اكبر الاقى اعيش من معاشى ماحسش انى باتذلل علشان اقبضه وباتذل لما اقبضه واتهزاء لما اصرفه
• عاوز مراتى لما اموت ماتتبهدلش بين الادارات علشان تصرف المعاش
• عاوز اكل اكل مش ملوث
• ولما اعيا الاقى الدواء واقدر ادفع تمنه
• عاوز الى ولادى بيتعلموه فى المدارس ينفعهم بعد كدة فى الدنيا
• عاوز اكون محترم جوة بلدى وبرة واحس ان بلدى بتحفظ لى كرامتى وانا برة البلد مش اتضرب واتسرق واتقتل ويطلع وزير الخارجية يقول دى حوادث فردية ولن تؤثر على العلاقة بين البلدين ( اسألوا عن الحرب الى قامت علشان حمار انجليزى اتهزاء فى اسكندرية مرة زمان ) .... هوه مش انا احسن من الحمار برضه ؟؟؟؟ طيب ليه انجلترا عملت للحمار ولامؤخذة كرامة ( او تلكيكة يعنى ) وانا لأ ؟؟؟

المهم يعنى اهو ده الى انا عاوزه واى واحد عاوز ياخد صوتى يعملى كل ده ...

-- ياسالاااااااااااااااااااااااااااااااااااااااام طيب ما كل المرشحين هايقولوا الكلام ده كله ويغنوه ويلحنوه لغاية ماتصدقه وتنتخبهم وحتى النظام الموجود الى انت بتقول ان الحاجات الى نفسك فيها دى مش موجودة حتى النظام ده حاططها فى انجازاته.... هاتضمن منين يافالح ؟؟؟؟؟

- مش عارف بقى ؟!!! حد يقدر يفكر معايا ويدلنى ازاى اقدر اضمن حقى بعد المولد ماينفض والسامر يخلص ؟؟؟؟؟؟

الزعيم

في مسرحية الزعيم بتاعت عادل امام قال حكمة البنى المصريين مع حكامهم فى جملتين :
1- انا الى يحكمنى اسـقـفـله وادعيله
2- هوه فيه رئيس بيموت ياباشا
وعلى فكرة ده مش بس فى رئاسة الدولة ده كمان على مستوى كل مدير فى اى شغل عام او خاص:
فمديرك له الحق انه يعيشك 100 100 وممكن يخليك مستور وممكن يرفدك وفى التلات حالات ماحدش هايحاسبه
يعنى لو وقفتله على الواحدة وده صح وده غلط يبقى قلتك احسن يامشمش وبالسلامة عند اول فرصة للتلكيك باى باى ياعسل ولا هاتقدر تفتح بقك ولاترفع قضية هو انت حمل مصاريف القواضى والمحاكم المهم هاتحط فردة **** قديمة ولامؤخذة فى الكلمة فى بقك وتروح تدور على شغل - يعنى اتشردت - طيب هوه انت كنت عملت حاجة غلط ؟؟ ابدا بس سعادته مش بيحب المناكفة وانت بقيت مقرف وعمال تراقب مش عارف مين بياخد رشوة وفلانة مش عارف ايه مع فلان ياساتر عليك.
طيب يبقى انت لو طبقت القاعدة الاولى للسيد الزعيم خالد الذكر حازم - قصدى عادل - امام انا الى يحكمنى اسـقـفـله وادعيله مش كنت نلت الرضاء السامى وخليتك فى شغلك وخدتلك قرشين ينفعوا العيال واهى نوايا تسند الزير ومش لو كنت طنشت شوية يمكن كانو ادوك حاجة كدة على ماقسم ماهو من حضر القسمة فليقتسم
المهم ماعلينا ايه دخل الكلام ده بقى فى السياسة ؟؟؟ اقولك
فمثلا عندنا لو وصل شخص ما للحكم (بصرف النظر عن ازاى يعنى - طبعا المقصود بالعربية ولا بالمترو احسن حد يفهمنى غلط) خلاص اتحلت كل مشاكله هوه واهله والى يتشددله
- ليه بقى ؟؟؟
-اقولك انا علشان ماعندناش اى حاجة بتحدد سلطات رئيس الجمهورية (سواء السلطة الخضراء او الطحينة وحتى سلطة البطاطس ودى كلكوا عارفينها هيه وبقيت عيلة سلطة القرع وسلطة الكوسة الشهيرة الخاصة بالشباب الباحث عن عمل حيث ان لها فوائد كثيرة لامجال لذكرها الان) مش بس السلطات لا وكمات الواجبات يعنى الالتزامات ( اى عيل صغير فى ابتدائى يعرف انه لو معملش الواجب ايه الى هايحصله ؟؟؟ الابلة - سورى المس - هاتضربه ) طيب لو الراجل الى جاى للرياسة ده لو ماعملش الواجب مين هايقوله خد بالك انت كدة مش هاتاخد درجات كويسة فى الامتحان الى جاى ؟؟؟؟ (بلاش يضربه احسن نروح فى داهية)
-هاتقوللى المفرض مجلس الشعب حلو قوى طيب هو مش مجلس الشعب ده هوه الى وافق على ترشيح الرئيس ؟؟
- اه ..!
-طيب يا اخى وفالقنى معاك من الصبح ليه لما هو اه !!!! هو انت لو جبت بطيخة فى بيتكوا وطلعت مش حلوة قوى ومراتك وعيالك (يعنى الشعب بتاع بيتكوا لامؤخذة باعتبارك المعلم الكبير بتاع البيت - الرئيس يعنى- ) قعدوا يتتريقوا عليك مش برضه هاتدافع عن البطيخة وهاتاكل منها وتقول دى زى العسل وهاتقعد توصف لهم مدى معاناتك فى البحث عن بطيخة كويسة وازاى انك لفيت السوق كله لغايت ماعينك وقعت عليها ومسكتها وقعدت تخبط عليه بحرفية شديدة لتكشف كما السونار على الحمار والحلاوة والترميلة وازاى كان فيه واحد بيفكر ياخدها ومد ايده معاك وكانت عركة كبيرة لغاية ماقدرت تنتزعها وتاخدها وتجرى لغاية الاوتوبيس وتصارع الافيال البشرية الى محشورة معاك وتنزل بعد بيتكوا بمحطتين محافظا على سلامة البطيخة وبعد كدة ناكرى الجميل دول ييجوا بكل بساطة ويقولولك وحشة .... مش عاوزينها ... عاوزينك تغيرها ولا مراتك تقوللك كفاية ماتبقاش تنزل السوق تجيب بطيخ تانى (يعنى عدلت طريقة شرا البطيخ ) ويقوم العيال والمدام بعمل استفتاء سريع على الماشى تكتشف فيه انك بقيت ممنوع من شرا البطيخ الى الابد الابشروط مجحفة وبرقابة صارمة من الجيران .... لا ياعم مش لاعب وكرسى فى الكلوب
وبعدين نخش فى القاعدة التانية
برضه هوه فيه رئيس بيموت ياباشا - واوعى تفتكر ان انت الباشا لاسمح الله - لما تكون رئيس ( وده بعيد عن شنبك طبعا ) ممكن جدا يعجبك الحال وده اكيد وانا اضمنلك انه هايعجبك جدا بس المشكلة ان فيه ناس تانية عاوزة تيجى مكانك - كلام مش معقول - بص هيه نصيحة الى بيفرط فى حقه مرة مابيعرفش يجيبه تانى يعنى من الاخر كدة اعمل الى تقدر عليه علشان تبقى موجود على طول والتزم بقاعدة عادل امام التانية انسى الموت من دماغك خالص وبيع قضية الحساب والجزاء تماما لانك لو فكرت فيها مش هاتعمل حاجة لعيالك وهوه الواحد عايش عشان مين مش هما العيلين دول الى الواحد طلع بيهم من الدنيا - وربنا يسترها مع الجميع - خلاص اولا تأمن لهم مستقبلهم وبعدين تظبط نفسك انت وتثبت رجليك وتخلى عينيك فى وسط راسك من الى عاوزين يدوك كتف ولا مقص حرامية ويوقعوك - وصدقنى المثل الى بيقول مش عارف ايه لاما بيقع بتكتر اسمها ايه سكاكينه المثل ده مظبوط - لو لاقدر الله ووقعت هاييجى الى بعدك ( اه ماهو لازم حد ييجى امال هانقعد كدة يعنى بس ماتفكرش فى ده دلوقتى مش وقته) بقى كنا بنقول هاييجى الى بعدة بقى ( ايوة ياعم والنبى هاييجى واحد تانى وبعده واحد تالت وكدة يعنى بس ماتزعلش نفسك بقى احنا محتاجينك) هاييجى يفضح الدنيا ويقول ده كان كيت وكيت وكيت ويقول على كل حاجة كنت بتعملها وكل حاجة ماكنتش بتعملها وكمان الناس النافقين ولاد ال*** الى حواليه قال علشان يرضوه هايلبسوك ولامؤخذة كل نقيصة ورزيلة ويتبلوا عليك ويقولوا كلام ياساتر يارب منهم ومن افعالهم السوده وانت لاحول الله مش هاتكون قادر تدافع عن نفسك ....
بس مش مهم الحل عندى والحل بسيط جدا :
اولا اوعى تسمع كلامهم وتصدق حكاية التداول السلمى للسلطة وتروح سايب الحكم باختيارك واديك شفت الفضايح الى قلتلك عليها
ثانيا لازم ماتخليش حد ينفع ييجى مكانك يعنى مايبقاش قدامهم حد غيرك اظن دى بقى سهلة شوف ايه الى بيلهى الناس ويبوظ اخلاقهم وطموحهم وصحتهم واتتك عليه شوية تتظبط الدنيا بالنسبة لك وظبط العيال والمدام فى جنسية بلد تانية من بتوع الحرية والعالم الحر او العالم البرد وظبط برده حساب برة للزمن ماحدش عارف الدنيا حايجرى فيها ايه بس مش كتير يعنى شوية شوية علشان ماحدش ياخد باله وهيه حاجة من اتنين يإما ينفذ امر الله وكدة تبقى اترحمت جدا لاننا شعب بيحترم الموتى وماحدش هايمثل بجثتك والعيال هايطفشوا ويعيشوا فى امان يإما تحصل حرقة (سورى قصدى حركة ) شوارعية شعبية مهلبية تشيلك وماتقلقش ماحدش فاضيلك ولا بيفكر فى كدة استنادا للقاعدة الاولى لعادل امام بس يعنى اذا حصلت - وده احتمال ضعيف جدا - ابقى اضرب نفسك بالرصاص هاتقولى اموت منتحر !!!؟؟؟ طب وفيها ايه يعنى ؟ وماله ؟؟
- يلا ياعم دانا اخش النار
- طب مانت داخل داخل هو انت فاهم نك لما تعمل كل الى انا قلتلك عليه فوق ده هاتورد على جنة ولا ربك هايخليك تشم ريحها ؟؟؟ ياللا بجملت بقى خليها فى الاخرة بس بدل ماتتشألط دنيا واخرة
وكفاية كدة احسن صوابعى وجعتنى